لا اعرف ان كانت عادة...ام صفة جائتنى مع علم الوراثة....المهم ان اخفاء جزء منى فى الظلال كان ..ولايزال قاعدة لاتقبل التغيير....ولكى تعرف عنى كل شئ...حاول ان تعرف كل من اعرف....ارمى نصف ماسمعته فى اقرب "صفيحة زبالة" ثم غربل الباقى....وها انت تعرفت نصف مابى حياتى....النصف الاخر بقى....يحتاج عمر...او تتوكل على الله وتتجوزنى...عشان اطلع النصف التانى عليك....وتتخرج من الدنيا ...وانت عااااااااااااااارف الى فيها

 

جائنى عرض لايمكن رفضة حقيقية....وان كان صعب جدا.....وهو ان ا>كر خمس اشياء لايعرفها عنى احد...العرض ده جاء من العزيزة....رشا...صاحبة مدونات النداهة المصرية....وهو عرض رائع ومرعب فى ذات الوقت

ليكن...مرحبا بك فى خمس اشياء عنى....الدخول على مسؤليتك الشخصية

 

بحب اكل "تفل الشاى"اى والله تفل الشاى..والحس بقية فنجان القهوة...البن المترسب فى قعر الفنجان ده مشكلة...طبعا تخيل منظرى ساعتها.....بشع

 

 

انا مكنتش بكره جارنا...العجوز...الله يرحمه بقى...وعيطت لما مات...حسيت انى ظلمته...وانه مكانش بيخوف ولاحاجة...وانا كنت بستثمر خيالات طفوليه بحته

 

 

اول حب فى حياتى....كان وانا فى ابتدائى..كنت بحب زميلى"عبدالله "وكنت بنافسه بشدة...معرفش كنت بحبه ليه...ولا انا مكنتش اساسا ايامها اعرف الحب...كنت مرتبطة بيه وخلاص...حتى لما كنا فى اعدادى..طبعا انفصلنا...بس كنت بقارن اى حد فى الدنيا بيه...لحد مااتقابلنا فى الثانوية...كان بيمتحن فى المدرسة الى جنبنا...شافنى وسط اصحابى وعرفنى....ونادى علينا بس مرديناش_لزوم الادب يعنى_ بس قولت فى

نفسى....يييييييييييييييع انا كنت بحب الواد المخنفس ده

 

عيطت ببشاعه يوم ماغيرت موبايلى الى فات.....معرفش ازاى انخلع قلبى لما اخويا اخده يبيعه...وجاب لى واحد تانى احدث منه....بس انا حسيت انى اتخطفت....موبايلى الى معايا فى كل حته...على المخده...فى حضنى...فى جيبى فى البيت....فى الشنطة فى الشغل...عارفنى....برفانى..عرقى...صراخى....ترتيبات العمل...ضحكتى...اصحابى.....مسجاتى....ياااااااااااااااااااااااااااه....هو جماد صحيح بس بكيته ولا كانه اعز اصحابى....موبايلى ربنا يرزقك حد يستخدمك برقة...ويحسن عشرتك...بحبك قوى يامنيل

 

رغم انى مش مرتاحة لفكرة الجواز.....بس نفسى ابقى ماما...قوى....طبعا انا ماما روحية للكثيرين دلوقت....كلهم من 17 سنه وانت طالع..وبحبهم وبقلق عليهم وبهتم لحالهم زى ماما بالظبط...بس نفسى اكون ماما ..وزوجة ..وست بيت قوى...وحاسه انى لن ابدع فى اى مجال فى العالم....زى ماهبدع فى عالمى المنزلى الجميل.....يارب لو كان ليا خير ارزقنى برجل ابن حلال واولاد صالحين انا وكل بنات المسلمين ....قااااااااااااااادر ياكريم............بس محدش يقول الكلام ده لحد....عشان الكل عارف انى مش عاوزة اتجوز.....قطيعه

وعليه.....فقد ذكرت خمس اشياء لاتعرفوها عنى......وده معادنا مع فقرة التلزيق المعتادة...او مايطلق عليه...ال..tagge

 

وانا ارشح الاسماء التاليه ليتم تلزيقهم

 الوغد احمد عبدالمولى

 

الجميلة علياء....مدونة ساالخير

 

 

المهندس الطائر......ياسر افندى هوكمان

 

سيدة مملكة جيرالدين

 

 

 

معرفش كتير فى عالم البلوجارية

 

بس نفس الزق اكبر عدد ممكن

هعدل اول مالاقى حد الزقه

ست المرتفعات....لولو

 

 

 

حين تنمو عشريناتك..تتغير كل معادلات التفاعلات اليومية..وينمو هاجس البحث عن ظل يحميك من حرارة الحقيقة

قلتها وانا  اقرع بكعبى العالى ارضية الميدان ..اسير نحو منتصف المدينة الصاخب بالالوان ..بالاشكال.. بمنحنيات الحياة  الحادة....كان يوما خاص للتدليل...هك>ا اسميته...يوما استمتع به...يظل حائطى

 

 

يقطع ظلى ظل التمثال القاتم لعبد المنعم رياض..ابتسم..اقرر ان اقطع ظل طلعت حرب ايضا....سالتها..هل تحمينا الظلال من الحقيقة؟؟

 

 

ادس الذكريات فى الحقيبة...مع مستحضرات وجهى..محفظتى...وهدية مديرى العائد من الحج..لاحاجة بى الى الامس اليوم..قلت لها...وانا ارقب اسيويا يعبر الشارع ...الشتا موسم السياحة الاسيوية...تذكرت

 

 

انتقيته دون ان المسه..تأ:كد من مقاسه..ولونه والماركة.......شعرت بحرمته........وبان لمسه هنا فى  العراء..انتهاكا لخصوصية لمسته الاولى ..نقدت البائع الثمن..انتظرت طويلا حتى اجد فرصة زمن يسمح بشرائه

 

 

مشيت كثيرا....طالعت الوجوه كلها...سألت عن كتاب  ابحث عنه...تمنيت ان ادخل كافية ريتش..ولم افعل...بحثت عن شال ..ولم اجد..تناولت غدائى ..شاندوتش جديد لم اجربه الا اليوم..قهوتى المفضلة..تجاهلت اتصال مزعج..كلمتها طول الطريق..وكلمتنى..وضعنا خططا..لليوم وغدا...وبعد بعد غد

 

 

فى اخر اليوم...وانا اخلع كعبى العالى..قالت لى علياء ..التى حدثتنى اليوم كما لم تفعل منذ زمن طوووويل

 

الحياة معكى ممتعة حقا....وابتسمت

 

 

انا  كنت نسيت الموضوع تماما...واحدة ماشية فى حالها ...اشتريت "درويتس"_ولو متعرفش درويتس ده مقرمشات كده زى الشيبسى_جعانه الساعة اربعه ولسه ورايا اروح ميدان لينان..كله بينده دقى امبابة..مفيش حد عنده دم يقول بولاق لواء...نهايته...لقيت مكروباص شحط راجع بظهرة ومش عامل حساب للاربع بنى ادمين الى كان هيدهسم..تفائلت...حركة البلطجة دى ميعملهاش الا سواق جدع واكيد ..اكيد هيستجدع ويقول لواء...اول مالمنادى نزل من العربية قلت بنظرة استجداء......لواء...قال وعينه هتخرم كيس الدوريتس بتاعى....ان شاء الله..فرحت ورغم انى مرتحتش لنظرته الى كانت هتاكل الدوريتس بورقته

طلعت ..طبعا كانت كل الكراسى فاضية اخترت الكرسة الى فى الصف التانى..ودخلت جوا خالص..قلت اهو اكل الدوريتس بعيدا عن اعين المتطفلين..وبعد الدوريتس اقيل شوية لحد ماميدان لبنان ربنا يكرمه كده ويجى....المهم مطولش عليكم...قولى طولى لقيت مين قاعد جنبى...مجلة لطيفة كده اسمها الا>اعة والتلفزيون..غريبة...الاغرب انها بتاعه انهاردة..ياسمين عبدالعزيز زى القمر على الغلاف قلت حلو هتسلى وانا باكل......بس مش ده الى حصل

فتحت لقيت ..بعيد عنكم وعلى السامعين....ملف كامل عن دستور بلدنا خالد الذكر..والتعديلات المقترحة...الى هتتفذ..هتتنفذ....نهايته استعذت بالله من الشيطان الرجيم...وقفلت المجلة ..ومسكت فى كيس الدوريتس قلت اخلصه قبل مالمنادى الفجعان ده يخلص لم ركاب ويطلع بقى ومنخلصش..خلصت وحطيت النص جنية فى ايدى..وحطيت راسى على الازاز..وهااااااااااااوم

 

طبعا مفيش داعى للتفاصيل...مسكت انا والمنادى فى خناق بعض..وروحنا قسم امبابة..هو بيقول انى رفضت ادفع الاجرة..وانا بقول انه حاول سرقة شنطتى..طبعا محدش من الركاب جه يشهد مع اهلنا عشان محدش فاضى يعطل مصالحه...نهايته..استنيا البيه الظابط يجى....وقفت كتير ومقدرتش..قعدت على الارض..طبعا الوغد كان بيظبط العسكرى بسجارة وبيعمل معاه احلى واجب..الوغد..ده انا فى فشنطتى تسعين جنية اشترى بيهم اتنين عساكر من عينته ومعاهم صول كمان

على الارض جنبى شاب لابس كويس..وشكلة معقول كده..سألته:هو البيه الظابط هيجى امتى ...ابتسم وقالى..براحته اى وقت...همممم بانت..يافرحتك بيا ياابه وانا جايباك على ملى وشك قسم امبابة...سألته تانى بقى..مانا فاضية...:هو الاخ تهمته ايه ان شاء الله....ابتسم تانى....ارهاب

نهار اسود

اتنفضت قومت...وانا ببحلق له...ارهاب..قسم امبابة ده ولاادارة مكافحة بدو سينا...ابتسم تانى

قال:اقعدى اقعدى متخافيش انا احكيلك...انا طالب فى كلية الهندسة ..وكنت بصور ورق بتاع اخر سكشن...الراجل بتاع التصوير اخر الورق..وكمان طلعه مش باين ومسود وحالته بالبلى..قمت طلبت منه يصوره تانى..قالى لاء تصوير تانى فلوس تانى...كلمة منى كلمة منه..اتخانقنا

انا بنفس الوش المتنح:وده ايه الى جابه للارهاب....انت ازهرى ياكابتن؟؟

هى هى نفس الابتسامة:لاء...بس جابونا القسم واحنا ماسكين فى خناق بعض واتعمل لنا محضر ارهاب

الف نهار ابيض...اتخانقوا واتعمل لهم محضر ارهاب...انا بقى هيتعمل فيا ايه..محضر ارهاب وحيازة دورتس

هو هو الوش المبتسم...:متخافيش محضر ارهاب...وعموما مفيش معتقلات حريمى يعنى هتتحطى هنا فى سجن القناطر او ابوزعبل جنب اهلك

نهار اغبر...ياعم معتقلات ايه...انا اتخانقت مع منادى ميكروباص..حاول يفتح شنطتى ويسرق كيس الدرويتس بتاعى...يالهوى...طيب انت متأ:د منين كده يااخ..طيب حتى لو فى ارهاب ولا بتاع من الى بتقوله ده...مش فى نيابة ومحكمة...اكيد هيعرفوا انى برئية...والله معملتش حاجة

ام الابتسامة السخيفة على وشه:انت حضرتك معندكيش فكرة...هنا النيابة والمحاكمة..القضية كلها هنا..بلدنا كلها هنا اساسا..انت مقرتيش الدستور بتاع بلدك ولا ايه

الدستور افتكرت المجلة الى كانت جنبى والى كانت بتطبل لتعديل الدستور...وافتكرت اخر اقتراح قريته من اول ما الاقتراحات اتقالت....نهار اسود ده حقيقى

 

*قانون الارهاب..... التعديل المقترح على مادة 179

استحداث اسم جديد للفصل السادس ينظم حماية الدولة من الارهاب ومادة جديدة تسمح بسن نظام قانونى يختص بمكافحة الارهاب وتجفيف منابعة ليكون بديلا تشريعيا لمكافحة ه>ا الخطر دون الحاجة لتطبيق قانون الطوارئ

 

يااخى فلقتى

صرخت فى وشة

كل المصايب دى وبتبتسم

هى السيجة ناقصة كلب

طبعا كنت بهلل مش بزعق...ولقيت العساكر اتلموا على تانى وهتك ياضرب......ووو

....................

 

اجرة ياانسة

ها...هو ميدان لبنان جه

لاء المحطة الى بعد كده.....بقرف اكمل..اجرة

 

..........

* نقلا عن جريدة الاهرام