.........

free falling

لو كان الواحد ممكن يمشى فى حياته وفوقه نيك نيم او علامة زى بيزى او اواى  كان النيك بتاعى الايام دى

free falling

والعلامة......away

الاستقالة ادتنى فرصة اقعد مع نفسى زى زمان...افكر بهدوء اكتر..فى نوبات الاسترخاء من اجل الصحة..صحيح فى حاجات معذبانى..وبتعكر مودى باستمرار...صحيح  لما بدور فى دخانيق روحى بلاقى احساس عظيم بالذنب...ساعات بلاقى وجع..وزهق..وصلب...وحاجات وحشة

بس لما ارجع اجر نفسى تانى لمنطقة الاسترخاء...واحط نفسى على كرسى مريح فى مرتفعاتى...واسكت خالص..ملقاش الا اللحظات دى....لحظات عزيزة...ومرت ثوانى

 

........

اول ماخرجت من مستشفى الملك فهد بالمدينة المنورة...كنت قعدت اسبوع هناك محجوزة بدراعى المكسور ...بابا خدنى انا واخواتى ولفينا على محلات اللعب..ساعتها سمح لى اجيب اى لعبة انا عاوزاها..اى كان سعرها وشكلها..اختارت علبة كبيرة..علبة مكياج لعبه...كانت عزيزة على قوى من ساعتها بلونها البينك والابيض ومرايتها الجميلة  وارففها المتعددة...كان يوم حلو قوى..وكنت حاسة بسعادة كبيرة...رغم الجبس اللى كان فى ايدى

.........

مكانتش اول مرة اكلم nile fm

بس كانت اول مرة اغنى على الهوا...صافى ليليتها كان بيحل محل اليسون اسبرى فى برنامج ال إيفننج سشن_وصافى دا لو مكنتوش عارفين احد نماذج فتيان الاحلام السريين بالنسبة لى...هو صحيح رخم بس له شخصية طاغية..والرجل موسوعة اغانى روك تمشى على قدمين..لايمكن وصفه بالوسيم...بس هو جاااااامد_ كان بينا حوار ضاحك خارج الهوا...ورخم على شوية على الهوا..وغنييييت....واو...اعتقد ان ادائى كان طيب...ساعتها غنيت

little pray for you

كنت فرحانة ساعتها....فرحة مجنونة..وضحكت كتير...كتيييير

 

.........

انا وعلا كنا قريبين جدا من بعضنا فى الكلية..هى اسكندرانية..وشها الصغير ودمها الخفيف...كنا طول عمرنا مع بعض فى السكاشن ومجموعات العمل..مرة كان عندنا سيكشن  فسيولوجى..والدكتورة نسيت تجيب جهاز السنتروفيوج...تبرعنا احنا الاتنين باننا نروح نجيبه...اول ماخرجنا من باب السيكشن...بصينا لبعض ...ضحكنا وجرينا...جرينا فى كوريدوريهات الكلية كلها..جرينا خوفنا البنات...جرينا وضحكنا..جرينا لحد مانفسنا انقطع..وفى الاخر جبنا الجهاز..ورجعنا...الدكتور كانت هتقتلنا لاننا اتآخرنا فعلا...بس عرفنا نزوغ منها باننا مكناش عارفين الجهاز فين...بس كانت ارواحنا خفيفة جدا...ساعتها....ياترا علا عامله ايه فى الدنيا دلوقت

.........

 

.........

 

 

 

 

 

 

 

 

 

 

 

 

 

 

 

.........

تركت عملى..استقالة..ومحاولات لاستعادة صحتى بمزيد من الاسترخاء...صحيح ان تمام الاسترخاء وتهدئة اعصابى لم يتم..لكن لنقل اننى حصلت فى الايام الماضية على فرصة طيبة لالتقاط الأنفاس ..فرصة لم يعكرها سوى اللحظات التى يجرفنى الملل فيها الى التلفاز

القنوات المصرية محتله باعلانات يلوح كل من يظهر بيها بعلم لمصر...المصيبة ان كل اعلان متبوع باغنية لشرين...وكلما هربت منها على قناة....وجدتها على الاخرى

حتى اخذت القرار..أمى تغير القناة وانا اصرخ"ماما خليها...انا زهقت وعاوزا اسمعها"..لا سبيل اذن سوى مواجهة الأغنية

 

 

امانة..معاكى ياختى بس مش فى ايدينا

لو كانت فى يوم فى ايدينا..وحاسين ان لينا فيها حق..اى حق..كنا علينا فيها من غير ماحد يغنى لنا ويقول لنا علو

مسألة نعيش دى بتاعة ربنا...يعنى العمر واحد والرب واحد...ومبقاش فى حاجة مضمونة  فى البلد دى..لاطرق ولامواصلات ....ولاكلاب أمير

مطمنين...هممم..دا على أساس انك مسمعتيش عن عماد الكبير...ولا اسلام نبية...ولا بلطجية الداخلية اللى مرشقين فى كل حته...ولاحتى عن العو اللى خوفوا بيه الناس واللى سموه سفاح المعادى

 

 

 

اه ياحبيبتى شربت..ومعه شربت المر..وهذا بالاضافة الى التلوث وفيرس سى..وماخفى كان اعظم

ومن ناحية الغنا...فكبرات البلد..بيغنوا علينا بما فيه الكفاية مش طالبة بقى...زيادة غنا

 

 

وبعيدا عن إن الشكوة لغير الله مزلة....فدى بقى حقيقى..الناس كلها ماشية بتكلم نفسها فى الشوارع..اللى المرتب طار من تلاته فى الشهر..واللى مش عارفة تعالج ابنها..واللى مش لاقى انسولين ليه ولا لمراته او ابنه..واللى مش لاقى شغل..واللى مش لاقى شقة...واللى مش لاقى حتى حق الرغيف المسرطن

 

 

 

انهى ضواحى...اللى معندهاش خدمات ..ولاتقصدى العشوائيات اللى ناسها مهدده كل يوم والتانى...بالطرد من البيوت..وفى بيوت لحد دلوقت الحكومة رافضة تدخل لها ميه الشرب...رغم ان الريس..الله يستره..قال ان المرافق تدخل العشوائيات....جرى ايه ياشرين إش حال لو مكنتيش من العشوائيات وعارفة

 

 

لاء ليا حقيقى...ارخص بلاج فى البلد ..دخوله للنفر الواحد بتلاته جنية...من غير شمسية..ولا اى مصاريف اضافية ...يعنى الواحد لازم....لازم يتصور...مش كل يوم هنصيف ياشرين...دا يبقى خراب ديار

 

 

هاتلى واحد فارقها..وقال الكلام دا ياشرين

واحدزينا...مننا....مش منهم ياشرين

واجعانا بلدنا قوى ياشرين

عشان هى الصحبة...وهى الأهل

 

 

 

ومن غير مانغيب

احنا بعيييد

قصرا  ياشرين

قصرا

ومبقاش فى ايدينا

الا الحنين

ونشيلها فى القلب

 

 

 

صحيح ياشرين

بس هى فين بلدنا

فين

 

 

 

 

 

 

 

.........

 

 

اللى عملوا الشبشب دا.....شربوا من نيلها برضه ياشرين

اللى باعوا الشبشب دا.....شربوا من نيلها برضه ياشرين

اللى لبسوا الشبب دا..... شربوا من نيلها برضه ياشرين

 

 

عشان هى ....الصحبة والأهل ياشرين

 

 

 

 

.........

قال لى صديق ذات مرة

إن أجمل مابمدونتى أنها لاتتحدث عنى بشكل مباشر

.........

إنها رسالة فى زجاجة

قد تلتقيك أنت ياسيدى

مدفونة فى رمال مدينتك الحبيسة

تعرفها..أو قد لاتعرفها

أو قد يلتقيها آخر

يعرفها..أو لايعرفها

.........

 

قبل ان ابداء

لاتكتب نهايتى

لأننى كتبتها

.........

كيف لى أن اكتب تلك الكلمات الآن بعد أيامنا التى ازهرت حمى حنون لفتنا واهدتنا فرح لم أعرف مثله كثيرا

كذا لاأعرف كيف دخلت الى تلك البؤرة الكئيبة من الأفكار_كنت أعرف إننى سادخلها لكنى كنت اؤجل الأمر

قد أكون نكدية..أو كما يقولون إن الأكتئاب مصاب بى منذ ثلاث وعشرون عاما هى عمرى الأفتراضى فى دنيا لم أعد أثق فى الكثير من معلوماتها

اراك تتململ..تغمض عينيك وتترك رسالتى الى الشمس او المصباح..اى ماكان يضئ فضائك الآن

تحملنى ياسيدى فأنا فى حالة من الرمادى لم تمر بى منذ ثلاث أيام..اى منذ اخبرتنى فى الهاتف..أنك تحبنى..ثلاث مرات..لا بل أربع

والسبب ليس أغنية تتسأل إن كانت الامور _ستنحل_بين السما والأرض..ولا وضعنا الشديد الغرابة لأى ذا عقل صحيح_بربك اخرجنا من الدائرة لان العشق مرض عقلى عميق التأثير _ولاحوارى مع أمى الذى لاينتهى عن زواجى..وحفل زفاف إبنة صديقاتها..والتى ستتركنى أفعل كل ماكانت تمتعض منه..فقد لكى أؤدى واجبى القومى ف_استلقاط عريس_..ولاصرختك المجنونة اليوم فى الهاتف..بأنك تحبنى..ولا كلمة أحبك التى  وصفتها بأنها حنون....ولاحتى حديثك عن نيتك فى التلميح لصديقنا المشترك

ولاتسألنى عن اسباب..لاننى بعد كل تلك الاستبعادات..لم أجد سبب معين لما مر بى

والفكرة التى تسكننى..هى إننا لن نلتقى كما نريد..ابدا

انت ياسيدى _واغفر وقاحتى ياحبى_لن تسعفك همتك التى منحتها للسعى..ولو كان ذا الهمة الأكبر يسعى للآخر..لكنت أنا التى تأخذ السبل اليك ياحبيبى

لقد خذلنى الكثير

خذلنى ابى بسفره الدائم

وأخى بعدم تفهمه التام

ومديرى بكونه مريض ومتسلط

ومشروع زواجى السابق

بكونه عديم الهمة

والطريق الذى لم يحملنى كما ينبغى

والاصدقاء

الذين تململوا من مرأى مصلوبة

وصليبى

من كثر ركونى اليه

والوتد

من لحمى ...ودمى

ولحمى..ودمى

بمرضى الأخير الطويل الوجع

 

والوجع

بك أنت ياحبى

 

لن أكذب عليك

انتظر خذلانك

الدعاء

لن يجلب أحدنا للآخر وحده

والبكاء والحاح الطلب من الله

لن يكسبنا الا فرصة العوض فى الآخرة

لكنى هنا ياحبيبى

هنا

على الأرض الآن

وعلى _كما على كل نساء الشرق_أن تكون

وأنت ياحبيبى بعييييد

_يظهر أسمك على شاشة هاتفى الآن_

وسلاسلى لاتسمح لى بالوصول اليك

فهل ستأتى

أم ستدعوا الله

ان نكون سويا

وتتخيلنى اناديك لآن الطعام جاهز

 

مجرد خواطر...حقيقية...تعيش داخلى

سوداء وكئيبة

وكفيلة بان تمنحنا لليلة سوداء

وأن تحرم القمر من مناجاتنا

تجاهلها أن لم تكن حقيقية 

قل لى أننى اخرف من كثر الركض العملى فى حياتى

وأنك ستأتى لتعلمنى كيف تتحدث النساء مع رجالهن

 

وان كانت حقيقية

فسامحنى ياحبيبى

فأنا ....أحبك

 

 

.........

أما عن نهايتى

فلن أستطيع الأن اقول

i won't write you off

so don't write me off...just yet

 

.........

ع بالى الأمور

مابين السما والأرض

تنحل