فى كتير لحظات عزيزة جوايا..اكيد هتطلع فى يوم تانى...عشان تسكنى السعادة..والفرحة
البوست دا كتبته من مده واتأخر لاسباب كتيره...ومكتوب اساسا عشان محمد النقيب..اللى بيعترض على توصيفى لنفسى بخالته_عشان انا اكبر منه بسنتين _بس الخالة وخصوصا لو كانت قريبة من الواحد فى السن بتبقى مزيج من الأم والأخت والصديقة..ودا يمكن اللى بحس بيه تجاه محمد النقيب
محمد..عاوزاك تفرح..ومعرفتش افرحك ازاى..الا انى اقولك..ان الفرحة جواك..هتلاقيها...دور عليها فى لحظاتك العزيزة..اللى مرت ثوانى
انا بمرر البوست دا...ليك
.
.
الاثنين, 18 يونيو, 2007
.........
free falling
لو كان الواحد ممكن يمشى فى حياته وفوقه نيك نيم او علامة زى بيزى او اواى كان النيك بتاعى الايام دى
free falling
والعلامة......away
الاستقالة ادتنى فرصة اقعد مع نفسى زى زمان...افكر بهدوء اكتر..فى نوبات الاسترخاء من اجل الصحة..صحيح فى حاجات معذبانى..وبتعكر مودى باستمرار...صحيح لما بدور فى دخانيق روحى بلاقى احساس عظيم بالذنب...ساعات بلاقى وجع..وزهق..وصلب...وحاجات وحشة
بس لما ارجع اجر نفسى تانى لمنطقة الاسترخاء...واحط نفسى على كرسى مريح فى مرتفعاتى...واسكت خالص..ملقاش الا اللحظات دى....لحظات عزيزة...ومرت ثوانى
........
اول ماخرجت من مستشفى الملك فهد بالمدينة المنورة...كنت قعدت اسبوع هناك محجوزة بدراعى المكسور ...بابا خدنى انا واخواتى ولفينا على محلات اللعب..ساعتها سمح لى اجيب اى لعبة انا عاوزاها..اى كان سعرها وشكلها..اختارت علبة كبيرة..علبة مكياج لعبه...كانت عزيزة على قوى من ساعتها بلونها البينك والابيض ومرايتها الجميلة وارففها المتعددة...كان يوم حلو قوى..وكنت حاسة بسعادة كبيرة...رغم الجبس اللى كان فى ايدى
.........
مكانتش اول مرة اكلم nile fm
بس كانت اول مرة اغنى على الهوا...صافى ليليتها كان بيحل محل اليسون اسبرى فى برنامج ال إيفننج سشن_وصافى دا لو مكنتوش عارفين احد نماذج فتيان الاحلام السريين بالنسبة لى...هو صحيح رخم بس له شخصية طاغية..والرجل موسوعة اغانى روك تمشى على قدمين..لايمكن وصفه بالوسيم...بس هو جاااااامد_ كان بينا حوار ضاحك خارج الهوا...ورخم على شوية على الهوا..وغنييييت....واو...اعتقد ان ادائى كان طيب...ساعتها غنيت
little pray for you
كنت فرحانة ساعتها....فرحة مجنونة..وضحكت كتير...كتيييير
.........
انا وعلا كنا قريبين جدا من بعضنا فى الكلية..هى اسكندرانية..وشها الصغير ودمها الخفيف...كنا طول عمرنا مع بعض فى السكاشن ومجموعات العمل..مرة كان عندنا سيكشن فسيولوجى..والدكتورة نسيت تجيب جهاز السنتروفيوج...تبرعنا احنا الاتنين باننا نروح نجيبه...اول ماخرجنا من باب السيكشن...بصينا لبعض ...ضحكنا وجرينا...جرينا فى كوريدوريهات الكلية كلها..جرينا خوفنا البنات...جرينا وضحكنا..جرينا لحد مانفسنا انقطع..وفى الاخر جبنا الجهاز..ورجعنا...الدكتور كانت هتقتلنا لاننا اتآخرنا فعلا...بس عرفنا نزوغ منها باننا مكناش عارفين الجهاز فين...بس كانت ارواحنا خفيفة جدا...ساعتها....ياترا علا عامله ايه فى الدنيا دلوقت
.........
لما بابا كان بيرجع من الموقع واحنا صغيرين..كان دايما بيجيب لنا معاه بسكويت ويفر بسكو مصر..كنا اول مانرجع من الحضانة ونلاقى بابا جه..نجرى على المطبخ..وعلى الترابيزة فى نفس المكان..دايما نلاقى البسكويت..دايما نفس المكان..دايما نفس البسكويت...بلون الغلاف الأحمر والأبيض...ودايما...كانت نفس الفرحة
.........
التمييز...ولو متعرفهوش دا نوع من الفطائر الافغانية..كان مشهور جدا فى المدينة المنورة..وكان فى افران كتيرة متخصصة لعمله فقط...ايام ماكنا فى المدينة..كنا كل يوم قبل مانروح البارك نلعب..كنا نمر على مخبز فى "الجرف"..نجيب منه تمييز..كنت انا واخواتى نحب نجيبه بنفسنا..شكل الفرن الدائرى..والخبازين الافغان..وريحه التمييز السخن...مر زمن طويل على فرحة التمييز
.........
لما عبدالرحمن أخويا/ابنى اتولد..كان عندى عشر سنين...ماما راحت الفجر لصديقتها طبيبة التوليد..وانا واخواتى روحنا المدرسة عادى...كنت متشوقة اعرف نوع البيبى جدا...بعد شوية حصص..استدعونا انا واخواتى لمكتب الناظر..الراجل قال لنا ياولاد خالتكم هنا..عاوزكم لو مكانتش خالتكم فعلا تقولوا ومتخافوش ابدا...كانت خالتوا جت تاخدنا عشان نروح معاها فى العربية...ولما نزلنا..لقينا ماما فى العربية ومعاها البيبى...عبدالرحمن..كان صغنن قوى...ودخل قلبى قوى..من ساعتها وانا بتمنى اكون أم
.........
هى ايه الفرحة...مش عارفة..بس عارفة اننا ممكن نلاقيها جوانا..فى اللحظات العزيزة اللى ساكنانا
أضف تعليقا
أضف تعليقا
<<الصفحة الرئيسية
.
.
من مصر
علياء.. مش عارف أقول ايه..
اللي في القلب في القلب وربنا أدرى بيه , ويارب تكوني أنتي عارفاه كمان ..
ربنا يخليكي يا علياء..