.........
على الجدران..اسمك
..على القضبان
..على الساعات
النازفات مع الرمال
على البدر
فى ليلة الهجرة
..إلى السفر
أكان اسمك..أم
أغنية ليلى
فى ظلمة القبيلة
أم...كان
هو القبيلة
أكان اسمك
مستهل اللغة
أم ختاما ..للقصيدة
أم كان هو..الدنيا
بلا أغيار
أنا..وبعض من نارك
والكون بقية من رمادنا
القرمزى
..أكنت ا سمك
أم كنتك..؟
أم كنت ومضة_فرق
بين العين
والبصر
.........
لوكانت تلك الكلمات تصلح كهدية..فهى لصديقتى المحتفلة تلك الإيام بحب عمرها..وقرب خطوبة وزفاف..إن شاء الله
كل حبى
علياء بسيونى
"قلة النوم بتعمل بلاوى"
.
.
الثلاثاء, 24 يوليو, 2007
الثلاثاء, 17 يوليو, 2007
.........
القصة خيالية..واى تشابه فى الأسماء او الشخصيات..هو محض خيال..واللى الكلام هيجى ع الوجيعة..انا مش مسئولة
.........
صباح مميز بالتأكيد..ليس لأنه أجازة رسمى....وليس لأنه اليوم الوحيد وسط الأسبوع الذى لااخوض فيه مغامرة اسكات الموبايل..ولاأفيق فيه على صوت إنتحار المنبه من فوق الكمود بعد أن اعيته محاولات إيقاظى..وليس لأننى لن أمارس رياضة القفز فى الميكروباصات الراكضة كما الثيران فى شوارع المحروسة..كلها أسباب قد تجعل اى صباح مميز..لكن ليس هذا الصباح..انه عيد ميلادى..وهو حدث لايحدث كما هو مفهوم..سوى مرة واحدة فى العام..وهذا العام..سأتم ربع قرن..خمسة وعشرون عاما بالتمام والكمال..أتخيل الرقم مكتوب بكريمة الشيكولاتة التى تقتلنى عشقا..على أرضية التورتة البيضاء..فأجده أنيقا جدا
انهيت طقوس الاستيقاظ المعتادة..وقفزت فى الصالة اصرخ فرحا..:ياصباح العندليب واللبن الحليب
لارد مشابة اتلقاه..قد يكون أحدهم رد على تحية الصباح لكن ضباب الإكتئاب سد كل حواسى..سريعا اعلن أخى انه سيمضى يومه مع أصدقاءه..ودفن أبى وجهه فى الجريدة..وأمى تتمتم باشياء لاأفهمها
أتناول خصلة من شعرى والفها حول سبابتى فى حركة هستيرية مميزة لى..هممم صباحه نكد..اقول لنفسى وانا الملم ابتهاجى واعود إلى غرفتى...أراجع مصائبى فلاأجد جديد..لاأعتقد ان شبورة النكد الصباحى كان سببها انى تناولت آخر قطعة جبنة رومى أمس قبل ان انام..هه يمكن عاملين لى سربرايز بارتى ولا حاجة
الساعات تمر..وأنا اتابع كل همسة..او لفته..قد تدل على ان اليوم هو عيد ميلادى..لكن لاشئ..غداء صامت..نوم قيلولة..مشاهدة تلفزيون ..كل هذا فى صمت كئيب..الثامنة تسلم العقرب الصغير الى التاسعة وأنا ارقب صمتهم فى غيظ...ثم لم أتمالك نفسى اكثر..:هو مفيش حفلة ولا ايه...إنهاردة عيد ميلاااادى
هنا حدث شئ لم اتخيله ابدا...إنفجرت أمى فى البكاء...الشئ الذى اصابنى بشلل مؤقت..وأنا أرى ابى يحاول تهدئتها ..ثم ينظر لى غاضبا ويقول: ليه كدا..حرام عليكى
وحين وصلبت أمى الى مرحلة الشحتفة كنت قد بدات افيق من حالة الشلل اياها...وبدأت فى التفكير المنطقى
"سمير طلق نهى الطلقة التالته
تهز رأسها نفيا
خالتو سعاد دخلت فى غيبوبة سكر تانى
تنفى مرة آخرى
نتيجة احمد اخويا طلعت
نفى مرة أخرى
طنط مايسة هترجع مصر
لاء
لا تمدنى ذاكرتى ببقية القائمة من المصائب...أسكت قليلا..ثم:أمال فى ايه؟؟
يعنى مش عارفة فى ايه...انهاردة عيد ميلادك
ودى فيها ايه..ماهو بيجى كل سنة وبناكل تورتة وجاتوة وهابى برث داى تو يو..وحاجات من دى...اشمعنى السنة دى
انهاردة انت تميتى 25 سنة...ولسه متجوزتيييييش
وانفجرت مرة آخرى فى البكاء
الحقيقة لم أجد كلمات قد تجدى امام دموعها الغزيرة..اتجهت الى غرفتى وانا اترنح..حقيقة لامجاز..لم اتخيل انها تفكر بهذة الطريقة ابدا..صحيح انها اهتمت كثيرا بأمر زواجى..ورتبت لى الآف القعدات الصالونية ..لكن لم اتخيل ابدا أن عدم زواجى حتى تلك اللحظة يسبب لها كل هذا الحزن والهم....يانهار أسود..انا عنست
.........
"الشر بره وبعيد ..متقوليش كدا"
تقول غادة..صديقتى وزميلتى فى المكتب
"يابنتى الجواز دا قسمة ونصيب..بس هيحتاج منك شوية تكتيكات"
اتناول خصلة شعرى المسكينة..والفها بعصبية حول سبابتى
"تكتياكت ازاى..يافالحة"
تضحك
"هو انت فاكراه انى اتجوزت مجدى بالساهل كدا...دا اخد من جتتى راقات"
اهلا...هو احنا فينا من كد
"يابنتى من طلب الجواز..لازم يتكتك ع العالى"
ايه المثل الغريب دا...نهايته
"تعالى نشرب اتنين شاى..وانا اشرح لك"
.........
صباح مميز بالتأكيد...لأنه الصباح الذى سأقوم فيه بتنفيذ أول خطوة..فى خطة استلقاط عريس
لكن الكلام فى الموضوع دا..محتااج قعدة
يتبع>>>>>
الثلاثاء, 10 يوليو, 2007
..........
لوبيجيلى تعليقات زى مابيجينى تاجات كانت تبقى مدونة شهيرة بحقيقى..أمرى لله..تاج تانى
........
التاج دا جانى....ورب العرش نجانى
هل فكرت فى إغلاق المدونة .. و السبب ؟
انا قفلتها فترة فعلا..كانت مغلقة للحزن فترة...وشكلى هقفلها قريب إن شاء الله إما بسبب التيجان..أو بسبب قله التعليقات وكثرة الزيارات
صورتك فى المدونة.. رمزيتها ؟
اها..دا أنت من بتوع رمزيتها وماهيتها...طيب دى صورة شبح كاترين الصغيرة حين أتت للزائر النائم فى غرفتها المهجورة..وظل هيثكليف ليلتها يناجى حبيبتة الميته منذ أكثر من عشرين عاما..ويناديها كالمسعور...كاتى ياحياتى..تعالى إلى...فهمت...الحمد لله
طبيعة كتابتك فى المدونة بشكل عام.. سياسة.. قصة.. عبث.. كلام فاضى ؟
اوووه...انت موصلكش انا بكتب ايه من إجابة السؤال اللى فات...طيب..دعنى أترك لخيالك توصيف مناسب لكتابة إنسانة تجد فى بشريتها يهوذية وفى خطيئة قلبها بالحياة..مدعاه للصلب
إنتم اللى بتجيبوه لنفسكم..اسئلة غريبة
لماذا تدون أصلا ؟
إسباب كتيرة...هبقى اكتب عنها بوست قريب...بس أى كان..تدوينى يسأل عنه أحمد عبدالمولى..إلى عاوز يضربه..يضربه..انا كنت فى حالى هو السبب والله
أحلى جملة قيلت لك فى وصف مدونتك ؟
هممم...هو مش جملة..هو تعليق كامل..من اوريون ديلجادو
علياء ...
جميل أن نلاحظ بين الحين والحين أن بقى بيننا من هم مثلك.
جميل أن أصل -ولو بين الحين والحين- إلى أراضيكم، ولو حتى فوق المرتفعات.
الأجمل بحق هو أن تجد تلك الأراضي -المرتفعات، وهؤلاء الباقين -وأنتِ... يبحرون في تجاه الشاطئ الذي ترنو إليه.
=-=
كوني بخير.
Orionالتعليق موجود فى سجل المرتفعات
التعليقات بالنسبة لك.. أهميتها ؟
مهمة طبعا....امال هقفل المدونة ليه
أفضل مدونة قرأتها.. يمكن اختيار عدة مدونات؟
لاء كتير صراحة..بس لوهختار تبقى مدونة الوغد...محمد ابوغرارة..بيت للحنين..هو مش بيكتب فيها كتير بس كل بوست بيبقى أجمل من اللى قبله
حد قل أدبه فى التعليق.. إيه رد فعلك ؟
محصلتش..بس لوحصل..هحذف التعليق طبعا..مش بس عشانى..بس عشان فى ناس بتدخل محبهمش يتضايقوا
أسوأ مدونة الاجابة اجبارية يمكن اختيار عدة مدونات هما كتير اصلا ؟أسوأ مدون مهو هتجاوب هتجاوب؟أسوأ بوست؟
ايه ياعم العنف دا...مدونة حجاب نقاب اند تراش....من حق كل واحد يؤمن بفكرة..مش من حقك ترمى بلاك وتجرح فى افكار الاخرين
إيه اللى هيحصل لايميلك لما تموت ؟
هيحصلنى
إديت الباسوورد لحد قبل كده ؟
الحالى...لاء حقيقى..هو فى حد يعرفها..بس ميعرفش انها الباس ورد..يعنى قراءة عداد النور من سنة ناس كتير فى هيئة الكهربا ممكن تعرفها..بس مش هتعرف ان دى الباس بتاعتى
-دا اسمه استظراف..مش اكتر متتخضوش-
اسمك ؟
علياء بسيونى
- دا إسم الشهرة طبعا..الإسم الفنى-
اسم الدلع المشهور وسط أصحابك ؟
كتير
لولو
لولوويذرينج
ويذرينج
ويذر....دى بتاعه زجلو
لولا
لولى0000 دى بتاعه ماما
لولآ..بالمد..بتاعه بابا
عاليتى..دا بتاع لمياء
عليؤ..دى بتاعه ولدنا فلاش
علياء هانم..دا بتاعه مديرى السابق
كفاية لكدا...الباقى فضااايح
عمرك ؟
23 فى إبريل المنصرم
برجك ؟
إيه الاحراج دا
بلاش
هو صينى وشمسى...فضايح
مجال دراستك ؟
بيولوجى...علم الحيوان..والماستر فسيولوجى إن شاء الله
شخصيتك نوعها إيه ؟
رينو ميجان..تلاته وعشرين سيلندر
السفر بالنسبة لك إيه ؟
أنا مبحبش التغير بطبعى
ودا اكتر حاجة بتضايقنى فى السفر
بس من تجاربى فيه اقدر اقول
ان السفر تجربة رائعة لأكتشاف آفاق أبرح
- ايه الحلاوة دى..انفع مذيعة فى النشرة والله -
المود بتاعك ؟
نار على زيت حار...وكتر الكشرى وحياتك
وقت فراغك بتعمل فيه إيه ؟
بقراء..بقعد على النت...بنضف اى حاجة فى البيت محتاجة تنضيف..بخترع حركات جديدة
الأكلة المفضلة ؟
شوية مش وجبنة قديمة وعليهم حبه طماطم وزيت ..اوعى
بس معنديش اعتراض لو ماما عملت لنا رستو ولاكانيلونى على الغدا
الصفات اللى خدتها من بابا ؟
الصفات اللى خدتها من ماما ؟
دول سؤالين منفصلين..بس انا معرفتش اجاوب عليهم لوحدهم..انا زى الميه اتحط فى اى قالب ابقى القالب دا...اروح مكتب بابا الكل يحلف انى كل بابا...اروح مكتب ماما السكرتيرة بتاعتها تحلف انى كلى ماما...عائلة ماما وماما نفسها بتقول انى واخده طبعها تماما..اروح عند عائلة بابا...الكل يقول البنت دى بسيونى اصيل مفهاش حاجة من عائلة مامتها
وعليه..فاعتقد انه تم خلطى مع بنتهم فى المستشفى..بس عموما..أنا مؤمنه انى كلى خالى الله يرحمه اللى مات وانا لسه متولدتش...بجد انا شبهة..ولا انتم رأيكم ايه
أكتر ست حاجات بتحبها ؟
بابا وماما واخواتى
دول كدا ست حاجات حلوين
بس عاوزا اخد اوفر
ابو محمد..ابنى اللى لسه مجبتهوش
اكيد طبعا بحب باباه جدا..دا انا بموت فى الواد من قبل ماتجوز ابوه اساسا
أكتر ست حاجات بتكرهها ؟
الغباء
الفقر
المرض
القهر
الغربة
التسلط
الشغل بالنسبة لك ؟
كيانى
وحلم الأمومة..الشغلانة اللى ربنا خلقنى عشانها
بس لسه مجاتش
إيه الكمبيوتر و الإنترنت بالنسبة لك ؟
العالم...الآن
وطريقه اتصال بكل حد..وحاجة
أمررهم لمين ؟
قبل مامرر..نفسى اقول للنقيب...روح الهى افرح فيك مدبوب فيك تاج من خمسين سؤال
كل دا تاج
ياظالم
امرر بقى لكلا من
رحيل..وعالمها السحرى
ريم البرارى المستحيلة
محمد جميل..نياهاهاه
اوداد..الوغد مش هيرد على التاج
علياء..سا الخير على عيونك ياقمرى
مصطفى يحيى..كنوع من التحية
ودمتم
الاربعاء, 04 يوليو, 2007
......قد تعلن الأرصاد ان الموجة الحارة فى طريقها الى الإنكسار..قد تنخفض درجة الحرارة..درجة..أو درجتين..لكن هذا لايمنع الجو من ان يكون حار بما يزيد عن المعتاد فى تلك الأيام...وتصورات ماسيكون عليه اغسطس تملاء رأسى كوابيس نهارية مفزعة حقيقة
زيارة لابد منها ..وطريق لاأختاره إلى المترو...أتذكر صديقى الليبى.. وإعجابه بالمترو..ادافع ابتسامة قد يفهمها موظف شباك قطع التذاكر ..بطريقة غير صحيحة..وأحمل ذكرياتى الباسمة وتذكرتى الى بواية العبور
الرصيف شبة الخالى..الاعلانات على الشاشات ..تصنع صخب لابأس به بعد رحيل القطارات....اتأكد مرة آخرى من اتجاه الرصيف..وبهدوء اسير نحو طرف الرصيف الذى لايقربه الرجال...الطرف..الذى يقابل عربات السيدات
لم أحب عربات السيدات..لانها دائما مزدحمة..لكن نادرا ماركبت غيرها..وكالعادة لاأعرف لذلك سببا...أقف على طرف الرصيف واترك بصرى لظلام النفق...تلفح وجهى تيارات هوائية فأعرف أن القطار قادم..كالكل اتأهب..وانتظر الكلمات على البدن الحديدى للقطار....سيدات فقطفى الداخل المزدحم..اجد مساحة تكفينى ..على الباب الفاصل بين العربة التى استقلها وعربة السيدات الآخرى استند وتنكشف امامى العربة كلها..على يمينى تجلس سيدة ترضع طفلها من تحت حجابها القصير...الصغير وهى ينعمان بهدوء جميل حقيقة..فعل الإرضاع أكثر الافعال التى تطلب هدوء حسبما اعتقد..أكثر أفعال الأمومة إثارة من وجة نظرى
سحبت تفكيرى من الصغير وإرضاعه..الى وقفتى..كنت اقف وقفة مرتخية متكسرة..لاتصلح ابدا_كما تقول كل تعليمات كتب البلوغ الامكتوبة_لبنات الناس المحترمات..اعتدلت وتابعت بقية الوقفات والجلسات حولى
انواع مختلفة من الملابس..الوان مختلفة..اطوال واحجام مختلفة..لكن شئ واحد يميز كل الواقفات والجالسات..تلك الراحة...سيدات يرحن اقدامهن بحركات ترددية لتخفيف وطئ الوقوف الطويل..سيدة تمرر يدها من تحت الحجاب لتعديل وضع شئ يضايقها..فتاة تجلس تلعب بموبايلها وتحرك قدميها بطفولية..آخرى ترفع مرآتها الصغيرة لمزيد من التفقد..وانا اعود لترك جسدى يرتخى فى وضعة المتكسر القديم..وأرقب فعل نمارسه كلنا دون اتفاق...الراحة
عادة..وكما تقول_كتب تعليمات البلوغ الامكتوبة_تكسر كل انثى وعيها وتنثره فى خلايها كلها حينما تكن بالخارج..خارج الرجال...عربة السيدات...هى الخارج الوحيد الذى يرتاح به وعى الخطر بالخلايا
ابتسم للصغير المستسلم للنعاس...وامه التى تسحب بهدوء نهر عطائها من فمه الصغير..احببت ساعتها عربة السيدات المزدحمة دائما..الخانقة دائما..المريحة لانوثتنا دائما...وأمومتنا دائما..وطفولتنا..دائما
المحطة قبل الأخيرة لى..اعدل ثيابى بحرية..اقترب من الباب..تمر بذاكرتى مكالمة الصباح..فلاأدفع الابتسام هذة المرة
قبل أن انزل..اهمس لجارتى بشئ لاحظته محذرة..فتبتسم فى كثير من الحرج.."ربنا يسترنا "..تقول..انزل الى الرصيف..وأنا اردد
ربنا يسترنا
<<الصفحة الرئيسية
.
.
